هەمەڕەنگ

داهێنانی ئامێرێك بە ڕێکەوت کە لە زۆربەی ماڵەکانماندا هەیە


ڕێکەوت هەندێک جار دەبێتە پەیدابوونی بەرهەمی ناوازەو بەکەڵك، کە ڕەنگە مرۆڤایەتی بتوانێت سوودیان لێ ببینێت، یەکێك لەو داهێنانانەی کە بە ڕێکەوت پەیدابووە، "مایکرۆ وەیڤ - microwave"ە، کە لەمڕۆدا لە چێشتخانەو ناندێنەکاندا بۆ لێنان یاخود گەرمکردنەوەی خواردن بەکاردەهێنرێت، چیرۆکی درووستبوونەکەشی بەم جۆرەیە:
لە ساڵی ١٩٤٦ لە ویلایەتە یەکگرتووەکانی ئەمریکا، "پێرسی سپێنسەر - Percy spencer"ی ئەندازیار، دەچێت بەرەو کار و "چۆکلێت" ێکیش دەخاتە ناو گیرفانی چاکەتەکەیەوە، "سپێنسەر" لە تاقیگەیەکدا کاری دەکرد، کە کاریان لەسەر تیشك و "Magnetron" دەکرد بۆ درووستکردنی سیستمی ڕاداری، لەو ڕۆژەدا شتێکی نامۆ ڕوویدا، ئەو چۆکڵێتەی لە گیرفانی "سپێنسەر"دا بوو بەهۆی ئەو تیشکەوە تووایەوە، لەمەوە بیرۆکەی ئەوەی بۆ هات، کە ئاخۆ دەتوانێت ئەم تیشکە لەسەر خۆراکی تر تاقیبکاتەوە؟
بۆ ئەمەش چەند دەنکە گەنمەشامییەکی وشکی خستە نزیکی تیشکەکەوە، کە بەهۆیەوە گەنمەشامییەکان دانە دانە تەقین، بەهۆی ئەم ڕێکەوتەوە ئامێری "مایکرۆ وەیڤ" پەیدابوو، بەڵام لە سەرەتادا ئەو ئامێرە وەکو ئەمڕۆ نەبوو، بەڵکو "1.7" مەتر بەرز و کێشیشی "350" کیلۆگرام بوو، هەروەها نرخەکەشی بۆ هەر دانەیەك "5000$" دۆلار بوو، کە تەنیا لە چەند ڕێستۆرانتێکدا بەکاردەهات، بەڵام لەدواییدا پەرەدرا بە ئامێری "مایکرۆ وەیڤ" و لەمڕۆدا لە زۆربەی ماڵەکاندا بوونی هەیە و سوودی لێ دەبینن.
دەشێت ڕێکەوتێك ببێتە هۆی داهێنانێکی لەم چەشنە، کە ڕەنگە ئێستا لە تەواوی دنیادا داهێنانێکی تری لەم چەشنە ڕوویدابێت، ڕەنگە بەسەر خۆشماندا ڕووبدات بەڵام دەرەنجامی ڕێکەوتەکان نەقۆزینەوە.




مانگ پێشتر - Jul 18 2017 10:44AM
Print Friendly and PDF
زیاتر
12