تەندروستی

زۆر سەیرکردنی تیڤی مەترسیدارە


بەگوێرەی توێژینەوەیەکی نوێی ئەمەریکی کە لە رۆژنامەی دەیلی مەیلی بەریتانی بڵاوکراوەتەوە، دەکرێت سەیرکردنی تەلەفزیۆن ببێتە ھۆی زیادبوونی ئەگەری خوێن مەیین لەناو لوولەکانی خوێندا، ھەتا بۆ ئەو کەسانەش کە بەبەردەوامی راھێنانی وەرزشی دەکەن.
ئەنجامی ئەو توێژینەوەیە ئاشکرایکردووە، ئەگەری خوێن مەیین لەو کەسانەی کە زۆر سەیری تەلەفزیۆن دەکەن، بەڕێژەی ١.٨ بەبەراورد لەو کەسانەی کە کەم سەیر دەکەن یاخۆد ھەر سەیر ناکەن زیاتر دەبێت.
توێژەرانی ئەو توێژینەوەیە بەشداریان بە ١٥١٥٤ کەس لە ئەمەریکا کردووە، کە تەمەنیان لەنێوان ٤٥ بۆ ٦٤ ساڵدایە.
ماری کۆشمان کە یەکێکە لە رێکخەرانی ئەو توێژینەوەیە دەڵێت: "خودی سەیرکردنی تەلەفزیۆن کارێکی خەراب نییە، بەڵکو خواردن بەدەم سەیرکردنی تەلەفزیۆن و دانیشتن بۆ ماوەیەکی دوور و درێژ بەبێ جووڵە لەکاتی سەیرکردن، مەترسی راستەقینەیە".
توێژینەوەکە زیاتر کاری لەسەر ئەو کەسانە کردووە، کە خوێن مەیین لە لاق و بازوو و حەوز و سیەکانیاندا روویانداوە، کە لە فەرھەنگی تەندروستی کوردیدا بە نەخۆشی دەوالی ناسراوە و ناوە زانستیەکەشی "VTE" ـە.
ئەنجامی توێژینەوەکە کە لە کۆمەڵەی ئەمەریکی دڵ پێشکەشکرا دەریانخستووە، قەڵەوی باوترین نەخۆشیە لای ئەو کەسانەی زۆر سەیری تەلەفزیۆن دەکەن و نزیکەی ٢٥%‌ مەترسی زیادبوونی خوێن مەیین لەو کەسانەیە، کە کێشیان زیادە.
دکتۆرە کۆشمان دەڵێت، "پێویستە مرۆڤ بیر لەوە بکاتەوە چۆن سوود لە کاتی سەیرکردنی تەلەفزیۆن وەربگرێت بۆئەوەی پارێزگاری لە تەندروستی خۆی بکات, بۆنموونە بەکارھێنانی ئامێری وەرزشی، لەوانەش پاسکیلی جێگیر، کە لەکاتی سەیرکردن جووڵە بۆ جەستەی مرۆڤ دەستەبەر دەکات، یاخۆد دواخستنی سەیرکردنی تەلەفزیۆن بۆماوەی ٣٠ خولەک و ھەندێ پیساکردن و دواتر گەڕانەوە بۆ سەیرکردن" ھەروەھا دەڵێت "ئەگەر ترسی ئەوەت ھەبێت بەرنامەیەک لەدەستت دەڕوات، ئەوا دەتوانی تۆماری بکەیت و دواتر بۆی بگەڕێیتەوە".



3 هەفتە پێشتر - Nov 19 2017 10:09AM
Print Friendly and PDF
زیاتر