هەمەڕەنگ

کەمبۆدیا بەدەست پیسبوونی ژینگەوە دەناڵێنێت



كەمبۆدیا یەكێكە لە وڵاتە دێرینەكانی جیهان كە دەكەوێتە كیشوەری ئاسیاوە، لە ئێستادا ئەم وڵاتە بە تایبەتیش شاری "فنۆم پێن" کە پایتەختەکەیەتی بەدەست زۆری ڕێژەی پیسبوونەوە دەناڵێنێت، ئەم شارە لە ئێستادا ڕووبەڕووی بڕێكی بێشومار لە پاشماوە و كەلوپەلی فڕێدراو بۆتەوە بەتایبەتیش ماددەی پلاستیكی و زەرف لەهەمانكاتدا كەمی خزمەتگوزاری پاككردنەوە لە ناوچەكەدا وایكردووە كە دیمەنێكی ناشیرن بە ناوچەكە ببەخشێت و بۆتە هۆی كەمبوونەوەی ڕێژەی گەشتیار لەناوچەكەدا.

بەپێ ڕاپۆرتی ڕێكخراوی “ACRA” ڕۆژانە نزیكەی 10 ملیۆن زەرف لەو شارەدا بەكاردەهێنرێت كە ئەمەش واتا دە ئەوەندەی لە شارێكی ئەوروپی، لەو پێناوەشدا لە ئێستادا كاردەكرێت بۆئەوەی چارەسەرێكی خێراو كاریگەر بدۆزرێتەوە و ڕێگری بكرێت لە بەكارهێنان و فڕێدانی ئەو بڕە زۆرەی پلاستیك و ماددەی نایلۆن و زەرف، لەو چوارچێوەیەشدا حكومەتی كەمبۆدیا لە مانگی نیسانی ئەمساڵدا بڕیارێكی دەركرد كە تیایدا داوا لە سوپەرماركێت و دووكانەكان دەكات كە بۆ هەر زەرفێك بڕی 10 سەنت لە كڕیارەكان وەربگرن. 

شانبەشانی هەوڵەكانی حكومەت، ڕێكخراوە ژینگەییەكانیش هەوڵدەدەن تەكنەلۆژیا بەكاربهێنن بۆ پاككردنەوەی ناوچەكەو بەرهەمهێنانی چارەسەرێكی جێگرەوەی باش، بۆ ئەم مەبەستەش ڕێكخراوی "كلینبۆدیا" هەستاون بە بەرهەمهێنانی زەرفێك كە هاوشێوەی زەرفی ئاساییە بەڵام لە ئاردی ڕووەكی "كاساڤا" دروستکراوە، واتا نیوەی مادەی پلاستیك و بۆ نیوەكەی تری سوودیان لە ڕووەكی كاساڤا وەرگرتووە، ئەمەش لەبەرئەوەی كە مادەی كاساڤا زووتر شیدەبێتەوە و یارمەتی ماددە پلاستیكیەكەش دەدات خێراتر شیببێتەوە.



3 هەفتە پێشتر - Sep 26 2018 7:56PM
Print Friendly and PDF
زیاتر