ئاژانسی ناسا لەڕێی 12 روانگە و مانگی دەستکردەوە چاودێریی خۆر دەکات، لە ساڵی 2018-دا لەڕێی ناردنی کەشتیی ئاسمانی "Parker Solar Probe" توانییان بەشێوەیەکی بەرچاو لە خۆر نزیکببنەوە و باشتر لە دیاردەی رەشەبای خۆری بکۆڵنەوە، کە بریتییە لە دەرچوونی بەردەوامی پلازما لە ئەستێرەکەوە.

لە ساڵی 1859-دا بەهێزترین رەشەبای خۆری تۆمارکراوە، کە زانایان دەڵێن، ئەگەر لە سەردەمی ئێستاماندا رووبدات، ئەوا سەرجەم مانگە دەستکردەکانی دەوری زەوی لەکاردەکەون و بەوهۆیەشەوە ئامێرە ئەلیکترۆنییەکانی سەر زەوی لە چاوتروکانێکدا لەکاردەخات و دەبێتە هۆی لەکارکەوتنی ئینتەرنێت و تۆڕی پەیوەندی.

پرۆفیسۆر ستیوارت بێڵ، مامۆستا لە زانکۆی کالیفۆرنیا و یەکێک لە بەشداربووانی توێژینەوە لە بواری رەشەبای خۆری بە رۆژنامەی "بزنس ئینسایدەر"ی رایگەیاند: " توێژینەوە لەبارەی میکانیزمی کارکردنی رەشەبای خۆری گرنگە، هەتا بزانین خۆر بە چ میکانیزمێک وزە فڕێدەدات و چۆن کار لە بواری موگناتیسیی زەوی دەکات، کە دەشێت بەهۆیەوە ئینتەرنێت و تەکنەلۆجیا لەسەر زەوی بۆ ماوەی چەندین ساڵ پەکبخات".